ગાંધીનગર- Gujarat Startups Growth Fund ગુજરાત સરકારના વિજ્ઞાન અને પ્રૌદ્યોગિકી વિભાગ દ્વારા આજે ‘ગ્રોથ ફંડ’ લોન્ચ કરવામાં આવ્યું છે. આ પહેલનો ઉદ્દેશ સ્ટાર્ટઅપ ઇનોવેશનના વ્યાપારીકરણને વેગ આપવાનો અને વડાપ્રધાન નરેન્દ્ર મોદીના ‘વિકસિત ગુજરાતથી વિકસિત ભારત-2047’ના વિઝનમાં વિજ્ઞાન અને ટેક્નોલોજી આધારિત યોગદાન આપવાનો છે. વિજ્ઞાન અને પ્રૌદ્યોગિકી પ્રધાન અર્જુનભાઈ મોઢવાડિયાની અધ્યક્ષતામાં સાવલી ટેક્નોલોજી એન્ડ બિઝનેસ ઇન્ક્યુબેટર દ્વારા ‘ગુજરાત ઇનોવેશન એન્ડ ટેક્નોપ્રે્યોરશિપ (GInTech) કોન્ક્લેવ 2026’નું ગાંધીનગરમાં આયોજન કરવામાં આવ્યું હતું.
સરકાર દ્વારા રૂપિયા 10 કરોડની ફાળવણી
વિજ્ઞાન અને પ્રૌદ્યોગિકી પ્રધાન અર્જુનભાઈ મોઢવાડિયાના હસ્તે ગ્રોથ ફંડનું લોન્ચિંગ કરવામાં આવ્યું હતું. જેના માટે ગુજરાત સરકાર દ્વારા રૂપિયા 10 કરોડની ફાળવણી કરવામાં આવી છે. જેમાં TRL-4 સુધીના પ્રારંભિક તબક્કાના સ્ટાર્ટ-અપ્સને પૂર્ફ-ઓફ-કોન્સેપ્ટ, ટેક્નોલોજી વેલિડેશન, વિવિધ ટ્રાયલ્સ અને સંબંધિત વિકાસલક્ષી પ્રવૃત્તિઓ માટે રૂપિયા 30 લાખ સુધીની ગ્રાન્ટ સહાય પ્રાપ્ત કરવા પાત્રતા રહેશે. તે જ રીતે, TRL-5 અને તેનાથી આગળના અદ્યતન તબક્કાના સ્ટાર્ટ-અપ્સને પાઇલટ મેન્યુફેક્ચરિંગ, ટેક્નોલોજી ડેમોન્સ્ટ્રેશન, પિવોટિંગ તથા બજારમુખી વિકાસ સંબંધિત જરૂરિયાતો માટે પ્રતિ સ્ટાર્ટ-અપ રૂપિયા 02 કરોડ સુધીની ઇક્વિટી-લિંક્ડ કન્વર્ટિબલ ફંડિંગ સહાય મેળવવાની પાત્રતા રહેશે.
ગુજરાતમાં 20,000 સ્ટાર્ટઅપ્સ સક્રિય
અર્જુનભાઈ મોઢવાડિયા જણાવ્યું હતું કે આજે દેશભરમાં આશરે 2,60,000 જેટલા સ્ટાર્ટઅપ્સ રજિસ્ટર્ડ થયા છે, જેમાંથી એકલા ગુજરાતમાં જ 18,000 થી 20,000 જેટલા સ્ટાર્ટઅપ્સ સક્રિય છે. આ સાબિત કરે છે કે ગુજરાત આજે દેશના સ્ટાર્ટઅપ ઇકોસિસ્ટમમાં અગ્રેસર સ્થાન ધરાવે છે. વડાપ્રધાનના 2047 સુધીમાં ભારતને વિકસિત રાષ્ટ્ર બનાવવાના સ્વપ્નને સાકાર કરવા માટે આ સ્ટાર્ટઅપ ઇકોસિસ્ટમ અત્યંત મહત્વપૂર્ણ છે.
અન્ય લોકોને રોજગારી
Gujarat Startups Growth Fund તેમણે કહ્યું કે સ્ટાર્ટઅપ ક્ષેત્રમાં યુવાનો આગળ વધી પોતાના આઈડિયાને પ્રોડક્શન લાઇન સુધી લઈ જવા માટે ગુજરાત સરકાર દ્વારા ખાસ નીતિઓ પણ બનાવવામાં આવી છે. અગાઉના સમયમાં જ્યાં યુવાનો માત્ર સર્ટિફિકેટ મેળવીને સરકારી કે કોર્પોરેટ નોકરીની અપેક્ષા રાખતા હતા, તેની જગ્યાએ આજે યુવાઓની માનસિકતા બદલાઈ છે અને તેઓ નોકરી મેળવવાના બદલે પોતાના આઈડિયાઝ થકી સ્ટાર્ટઅપ શરૂ કરી અન્ય લોકોને પણ રોજગારી પૂરી પાડી રહ્યા છે.
મજબૂત તક ઉપલબ્ધ
આજે લોન્ચ કરેલી યોજના દ્વારા ટેક્નોલોજી આધારિત સ્ટાર્ટ-અપ્સને તેમના નવાચારને પ્રયોગશાળાથી બજાર સુધી પહોંચાડવામાં જરૂરી નાણાકીય સહાય અને વૃદ્ધિ માટેની મજબૂત તક ઉપલબ્ધ થશે તેમ મોઢવાડિયાએ કહ્યું હતું.
સ્ટાર્ટ અપ સેક્ટરને વેગ
Gujarat Startups Growth Fund તેમણે રાષ્ટ્રીય સ્ટાર્ટઅપ પ્લેટફોર્મમાં ગુજરાતના સફળ પ્રદર્શન, કેટલાક શ્રેષ્ઠ ઇનોવેશન અને વૈશ્વિક સ્તરે સંરેખિત નવીનતાઓને અનુવાદિત કરવામાં ગુજરાતની આગામી યોજનાઓ પર પણ પ્રકાશ પાડ્યો હતો. તેમણે તમામ હિસ્સેદારોને નીતિઓ, શ્રેષ્ઠ વૈજ્ઞાનિક માળાગત સુવિધાઓ અને ટેક્નોલોજી કેન્દ્રિત વ્યૂહાત્મક પ્લેટફોર્મનો લાભ લેવા આમંત્રણ આપ્યું હતું. આ કેન્દ્રિત અભિગમને કારણે સ્ટ્રેટેજિક વૈશ્વિક ભાગીદારીઓ સફળ બની શકી છે અને સ્ટાર્ટ અપ સેક્ટરને વેગ મળશે.
એજન્સીઓ સાથે MoU
આ કોન્ક્લેવમાં ગુજરાતના 6 ઝોનમાં STBI ના 8 પ્રાદેશિક ઇનોવેશન સેલ્સની જાહેરાત કરવામાં આવી હતી. કોહોર્ટ આધારિત એક્સિલરેશન પ્લેટફોર્મ, આત્મનિર્ભર ગુજરાત ફેલો, શેડો ઇન્ટર્નને પ્રોત્સાહન અને રાષ્ટ્રીય સ્તરે પ્રખ્યાત એક્સિલરેટર એજન્સીઓ સાથે MoU કરવામાં આવ્યા હતા. કોન્ક્લેવમાં STBIના ડાયરેક્ટર ડૉ. આનંદ ભાડળકર તેમજ સ્ટાર્ટઅપ ઇકોસિસ્ટમ, ઉદ્યોગ જગત, રોકાણકારો, ઇન્ક્યુબેટર/એક્સિલરેટર તથા વિવિધ સંસ્થાઓના પ્રતિનિધિઓ ઉપસ્થિત રહ્યા હતા.
