ગાંધીનગર- Gujarat Sowing 2026 ગુજરાત રાજ્યમાં ચાલુ ખરીફ સીઝન(ચોમાસુ) 2026 દરમિયાન સાર્વત્રિક વરસાદ બાદ વાવેતરની કામગીરીએ ઝડપ પકડી છે. કૃષિ વિભાગ તરફથી પ્રાપ્ત થયેલા આંકડા મુજબ રાજ્યના સામાન્ય સરેરાશ વાવેતર વિસ્તાર સામે અત્યાર સુધીમાં 59.26 લાખ હેક્ટર એટલે કે આશરે 70 ટકા જેટલા વિસ્તારમાં વાવેતર થઈ ચૂક્યું છે. જેમાં ગુજરાતના કૃષિ અર્થતંત્રના બે મુખ્ય સ્તંભ સમાન કપાસ અને મગફળીનું કુલ વાવેતરમાં 63 ટકાથી વધુ યોગદાન રહ્યું છે.
ગુજરાતમાં સારો વરસાદ
ગુજરાતમાં ચોમાસાના પ્રથમ રાઉન્ડમાં ખૂબ સારો અને પ્રગતિકારક વરસાદ વરસ્યો છે. ખાસ કરીને દક્ષિણ ગુજરાત અને સૌરાષ્ટ્રમાં સૌથી વધુ વરસાદ નોંધાયો છે. તેમજ પાછળથી ઉત્તર ગુજરાત અને મધ્યગુજરાતમાં પણ વરસાદ આવ્યો છે. ઓવરઓલ જોઈએ તો ગત વર્ષ કરતાં આ વર્ષે જુલાઈમાં 5થી 8 ટકા વધુ વરસાદ થયો છે. સીઝનનો કુલ 55 ટકા વરસાદ નોંધાયો છે જેને પગલે જગતનો તાત ખેડૂત રાજીનો રેડ થયો છે. અને તેમણે પ્રથમ રાઉન્ડના વરસાદને અંતે વાવણી કાર્ય ઝડપથી શરૂ કર્યું છે. અત્યાર સુધીના અહેવાલો પ્રમાણે 70 ટકા વાવણી પૂર્ણ થઈ છે.
કપાસનું સૌથી વધુ વાવેતર
રાજ્યમાં કપાસનું સૌથી વધુ 20 લાખ હેક્ટરમાં અને ત્યારબાદ બીજા ક્રમે મગફળીનું 17.50 લાખ હેક્ટરથી વધુ વિસ્તારમાં વાવેતર પૂર્ણ થયું છે. જેના પરથી અંદાજ લગાવી શકાય કે, દર વર્ષની જેમ ચાલુ વર્ષે પણ ખેડૂતોનો તેલીબિયાં અને રોકડિયા પાકો તરફ ઝુકાવ વધારે જોવા મળ્યો છે.
સોયાબીનની 99 ટકા વાવણી
Gujarat Sowing 2026 ચાલુ ખરીફ સિઝનમાં સોયાબીનના વાવેતરમાં પણ અભૂતપૂર્વ ઉત્સાહ જોવા મળ્યો છે. રાજ્યમાં સોયાબીનના સામાન્ય વાવેતર વિસ્તારની સામે અત્યાર સુધીમાં 99 ટકા એટલે કે 2.79 લાખ હેક્ટર વિસ્તારમાં વાવેતર પૂર્ણ થઈ ગયું છે. સોયાબીન બાદ સામાન્ય વાવેતર વિસ્તારની સરખામણીએ મગફળીનું 91 ટકા, મકાઈનું 90 ટકા, અડદનું 86 ટકા અને કપાસનું 84 ટકા વાવેતર થઈ ચૂક્યું છે.
કઠોળના પાકનો વાવેતર વિસ્તાર વધ્યો
ગુજરાતમાં કઠોળ પાકોના વાવેતરમાં નોંધપાત્ર સુધારો જોવા મળ્યો છે. ગત વર્ષે આ સમયગાળા દરમિયાન કઠોળ પાકોનું વાવેતર 2.52 લાખ હેક્ટર હતું, જે ચાલુ વર્ષે વધીને 2.85 લાખ હેક્ટર થયું છે; જે સામાન્ય વાવેતર વિસ્તારની સાપેક્ષે 68 ટકા થાય છે. કઠોળ પાકોમાં મુખ્યત્વે તુવેરનું 1.94 લાખ હેક્ટર (76 ટકા) અને અડદનું 70,772 હેક્ટર (86 ટકા) વિસ્તારમાં વાવેતર થયું છે. આ ઉપરાંત મગનું વાવેતર હાલમાં માત્ર 11,900 હેક્ટરમાં (21 ટકા) નોંધાયું છે.
ધાન્ય પાકોમાં ડાંગર મોખરે
Gujarat Sowing 2026 રાજ્યમાં ધાન્ય પાકોનું કુલ 8.39 લાખ હેક્ટર (61 ટકા) વાવેતર નોંધાયું છે. જેમાં 4.63 લાખ હેક્ટર વાવેતર સાથે ડાંગર મોખરે અને 2.54 લાખ હેક્ટર વાવેતર સાથે મકાઈ દ્વિતીય ક્રમે છે. રોપણી આધારિત પાક હોવાથી આગામી દિવસોમાં ડાંગરના વાવેતરમાં હજુ પણ મોટો વધારો થવાની પૂર્ણ સંભાવના છે. રાજ્યમાં જુવારનું ચાલુ વર્ષે 10,301 હેક્ટર વિસ્તારમાં વાવેતર થયું છે, જે ગત વર્ષે આ સમયગાળા દરમિયાન અડધા કરતાં પણ ઓછું એટલે કે 4,319 હેક્ટર હતું.
શાકભાજીનું વાવેતર
આ ઉપરાંત રાજ્યમાં દિવેલા (એરંડા)નું વાવેતર હાલ 52,655 હેક્ટર અને તલનું વાવેતર 7,597 હેક્ટર થયું છે. દિવેલા એ મુખ્યત્વે ઓગસ્ટ મહિના દરમિયાન વાવવામાં આવતો પાક હોવાથી આગામી બે અઠવાડિયામાં તેના વિસ્તારમાં નોંધપાત્ર વધારો થવાની પૂર્ણ સંભાવના છે. અન્ય પાકોમાં, રાજ્યમાં ચાલુ વર્ષે ઘાસચારાનું 5.21 લાખ હેક્ટરમાં (સામાન્ય વિસ્તારના 51 ટકા) વાવેતર થયું છે. તદુપરાંત, શાકભાજીનું 1.71 લાખ હેક્ટરમાં (64 ટકા) અને બાજરાનું 1.06 લાખ હેક્ટરમાં (60 ટકા) વાવેતર પૂર્ણ થયું છે.
